ဂျပန်လူမျိုးတို့ အထွတ်အမြတ်ထားရာ ဆာကူရာပန်းတို့ရဲ့ အလှတရား

ဂျပန်လူမျိုးတို့ အထွတ်အမြတ်ထားရာ ဆာကူရာပန်းတို့ရဲ့ အလှတရား

ဂျပန်နိုင်ငံဟာ ပန်းတွေကို တန်ဖိုးထားလွန်းတဲ့ နိုင်ငံတစ်နိုင်ငံပါ။ အထူးသဖြင့် ဆာကူရာလို့ခေါ်တဲ့ ချယ်ရီပန်းလေးတွေပါ။

ဆာကူရာ ရာသီရောက်ချိန်မှာတော့ ဂျပန်နိုင်ငံရဲ့ လမ်းမထက်ဟာ ပန်းခင်းအဖြစ်သို့ ရုတ်ချည်းပြောင်းလဲသွားပါတော့တယ်။

တကယ်တော့ ဆာကူရာဟာ ဂျပန်လူမျိုးတို့အတွက် လှပတဲ့ ပန်းတစ်ပွင့် ဆိုတာထက်ကို ပိုပါတယ်။ ဂျပန်နိုင်ငံဟာ လူနာပြက္ခဒိန်ကို အသုံးပြုခဲ့တဲ့ ရာစုနှစ်များတစ်လျှောက် ၁၈၇၂ ခုနှစ် အထိ နှစ်သစ်စတင်ပြီးနောက်မှာ ဆာကူရာပန်းများ ပွင့်ခဲ့ပါတယ်။

ဒါကြောင့် ဆာကူရာပန်းဟာ အသစ် အသစ်သော စတင်ခြင်းများကို ကိုယ်စားပြုပါတယ်။ 

လယ်သမားများကလည်း စိုက်ပျိုးခြင်းနဲ့ ရိတ်သိမ်းခြင်းအတွက် သူတို့ရဲ့ လယ်ကွက်များကို အဆင်သင့်ဖြစ်စေရန်အတွက် ပထမဆုံးသော ပန်းပွင့်များလို့ ယူဆခဲ့ကြပါတယ်။

ယနေ့ထိ ဂျပန်နိုင်ငံရဲ့ အယူအဆကလည်း ဆာကူရာများ ပွင့်လန်းလာခြင်းကို စတင်ခြင်းလို့ အဓိပ္ပာယ် သတ်မှတ်ကြပါတယ်။

စာသင်နှစ်တစ်ခုရဲ့ အဆုံးနဲ့ နောက်တစ်ခုရဲ့ အစမှာ ပန်းပွင့်များပေါ်လာတတ်ပြီး လူကြီးတို့ဟာလည်း အလုပ်သစ် စတင်ခြင်း သို့မဟုတ် လုပ်ငန်းခွင်တစ်ခုမှ အခြားတစ်ခုသို့ ပြောင်းရွှေ့တဲ့အချိန် ဖြစ်ပါတယ်။

ဂျပန်ယဥ်ကျေးမှုအတွက် ဆာကူရာဟာ ပျော်ရွှင်မှုနဲ့ လွမ်းဆွတ်ဖွယ် ခံစားချက်များကို ဖြစ်ပေါ်စေပါတယ်။ 

ပန်းပွင့်တွေက အချိန်တိုတိုအတွင်း ပေါ်လာကြပြီး နှင်းများကဲ့သို့ လှပစွာ ကြွေကျလာတာကြောင့် ဘဝရဲ့ မမြဲခြင်း သင်္ကေတတစ်ခုလည်း ဖြစ်ခဲ့ပါတယ်။

ဆာကူရာပန်းတွေဟာ လွန်ခဲ့တဲ့ နှစ်ပေါင်းများစွာကတည်းက ဂျပန်မှာ မွေးဖွားလာခဲ့ပြီး အရာဝတ္ထုများ၊ ဘဝနဲ့ ချစ်ခြင်းမေတ္တာတို့ရဲ့ ဖြတ်သန်းခြင်းတွေကို ကြောက်ရွံ့ထိတ်လန့်မှုနဲ့ အလေးအမြတ်ထားမှုတို့ကို ရည်ညွှန်းတဲ့ စကားရပ်တစ်ခုလည်း ဖြစ်ပါတယ်။ 

နူးညံ့သိမ်မွေ့တဲ့ ဆာကူရာပန်းပွင့်တွေကို တစ်နှစ်ထက်တစ်နှစ် အချိန်တိုတိုလေးအတွင်း မြင်နေရတာကြောင့် လူထုကလည်း ပိုပြီး အမြတ်တနိုးဖြစ်ကြပါတယ်။

ဆာကူရာပန်းရဲ့ တခဏတာ အလှတရားကို နက်နက်ရှိုင်းရှိုင်း သိရှိထားခြင်းကြောင့် ဟာနမီ သို့မဟုတ် ပန်းကြည့်ခြင်း ဓလေ့တစ်ခုဟာလည်း ဂျပန်နိုင်ငံမှာ ထွန်းကားခဲ့တာဟာ ကြာမြင့်ခဲ့ပါပြီ။ 

Heian ခေတ် (794-1185) ကတည်းက မင်းမျိုးမင်းနွယ်များဟာ ချယ်ရီပန်းများရဲ့ ခမ်းနားထည်ဝါမှုကို ရောင်ပြန်ဟပ်ကာ ပန်းကြည့်ခြင်းပွဲများအဖြစ် ကျိုတိုမြို့ အပြင်ဘက် တောင်တန်းများအထိ ခရီးလှည့်လည်လေ့ရှိကြပါတယ်။

အဲဒီခေတ်ကာ နန်းတွင်းထဲက စာပေဆရာကြီးတွေနဲ့ ကဗျာဆရာကြီးများကလည်း ဆာကူရာပန်းရဲ့ အလှတရားတွေကို အပြိုင်အဆိုင် စာဖွဲ့ခဲ့ကြပြီး တော်ဝင်မျိုးနွယ်တွေကို ဆက်သလေ့ရှိတယ်လို့ သိရပါတယ်။

၁၇ ရာစုမှ စတင်ပြီး မင်းမျိုးမင်းနွယ်များသာမက သာမာန်လူများဟာလည်း ယနေ့အချိန်လိုမျိုး ဆာကူရာပန်းများကို ငေးကြည့်ကြတဲ့ ဓလေ့ထွန်းကားခဲ့တာပါ။

ဆာကူရာပန်းတွေ ပွင့်လာတဲ့အခါ သူငယ်ချင်းများ၊ မိသားစုများနဲ့ လုပ်ဖော်ကိုင်ဖက်များက သစ်ပင်များအောက်မှာထိုင်ကာ နူးညံ့တဲ့ ပန်းပွင့်တွေကို ရှုစားရင်း ပျော်ပျော်ပါးပါး အချိန်ဖြုန်းကြလေ့ ရှိပါတယ်။

မြို့ကြီးပြကြီးတွေမှာတော့ ချယ်ရီပန်းများအောက်မှာ နေရာရဖို့၊ ရွေးချယ်စရာနေရာများအတွက် ပြိုင်ဆိုင်မှုများ ရှိနိုင်ပါတယ်။

ညနေခင်း ပါတီပွဲအတွက် သူတို့လိုချင်တဲ့ နေရာရဖို့အတွက် မနက်စောစောကတည်းက နေရာထိုင်ခင်းတွေ စီမံပြီး ရပ်ကွက်ထဲက လူတွေ စုနေကြတာကို တွေ့ရတာလည်း မဆန်းလှပါဘူး။ 

ဒါပေမယ့် မြို့ငယ်လေးတွေမှာ ဒီလိုပြဿနာမျိုး မရှိတတ်ကြပါဘူး။ ပန်းပင်တွေဟာ မြို့ကြီးများနဲ့ မြို့သေးများအပြင် မြစ်အများစုကို စီတန်းကာ ပန်းခြံများစွာမှာလည်း ဖူးပွင့်ကြတာကြောင့် ဆာကူရာတွေကိုကြည့်ဖို့ အထူးတလည် နေရာရှာနေဖို့လည်း မလိုပါဘူး။

သို့ပေမယ့် ဘယ်အချိန်မှာ ပန်းတွေပွင့်တတ်ကြလဲဆိုတာကိုတော့ သိရှိထားဖို့ လိုအပ်ပါတယ်။ ဆာကူရာတွေကို ကြည့်ရှုဖို့ အကောင်းဆုံးအချိန်ကို လူတိုင်း သတိပြုမိစေရန်အတွက် ဂျပန်ရှိ မိုးလေဝသခန့်မှန်းသူများက ပန်းပွင့်မယ့်အချိန်နဲ့ ပန်းပင်များနေရာတွေအတွက် ခန့်မှန်းချက် မြေပုံများကိုပေးလေ့ရှိပါတယ်။

ဆာကူရာတွေဟာ ယေဘူယျအားဖြင့် တောင်ဘက်မှာ စတင်ပွင့်ကြပြီး မြောက်ဘက်သို့ ဖြည်းညှင်းစွာ ရွေ့လျားကာ မေလနှောင်းပိုင်းမှာ သူတို့တွေရဲ့ နားခိုရာ ဟိုကိုင်းဒိုးမှာ အဆုံးသတ်ကြပါတယ်။

ဆာကူရာပန်းဟာ ဂျပန်တို့ရဲ့ အနုပညာသမိုင်းတစ်လျှောက်မှာလည်း အဓိက အခန်းကဏ္ဍကနေ နေရာယူထားပြီး ကဗျာ၊ စာပေ၊ ဂီတ၊ ပန်းချီ အစုံအလင်ဟာ ဒီပန်းရဲ့ အလှတရား၊ ရနံ့၊ အရောင်အသွေး၊ အသွင်အပြင်၊ ရနံ့ စတဲ့ ဂုဏ်သတ္တိတွေကို အမြတ်တနိုး သီကုံးဖန်တီးကြပါတယ်။

ဂျပန်တွေမှာ နိုင်ငံပန်း (အမျိုးသားပန်း) လိုမျိုး သတ်မှတ်ထားတာ မရှိပေမဲ့ မဖြစ်မနေ သတ်မှတ်ကြမယ်ဆိုရင်တော့ ဆာကူရာတို့ဟာ ထိပ်ဆုံးနေရာကနေ ပါဝင်ရွေးချယ်ခံရပါလိမ့်မယ်လို့ ဆိုလိုက်ရပါတယ်။

Knight News Team

Knight News © 2022

Leave a Reply

Your email address will not be published. Required fields are marked *